CHADEMA YASEMA WAZIRI KAGASHEKI ANASHIRIKIANA NA MAJANGILI KUTOROSHA PEMBE ZA NDOVU, YAMTAKA RAIS AINGILIE KATI KUNUSURU RASILIMALI ZA NCHI.

MBUNGE wa Iringa mjini na Waziri Kivuli wa Mali Asili na Utalii (Chadema) Mch. Peter Msigwa amemtaka rais Kikwete kuchukua hatua za maksudi na kuingilia kazi za Waziri wa Maliasili na Utalii kwa madai kuwa waziri huyo ameshindwa kazi na anakula sahani moja na majangili.

Akiongea na waandishi wa habari leo jijini Dar es salaam Msigwa amesema anasikitishwa na hatua ya serikali kukaa kimya ili hali ujangili wa pembe za ndovu ukiendelea huku waziri huo wa mali asili na utalii Balozi Hamisi Kagasheki akiwa kimya.

Msigwa aliyasema hayo kufuatia kukamatwa kwa pembe za ndovu huko Hong Kong, China jambo ambalo alitegemea Tanzania wizara husika ungechukua hatua za haraka kubaini wezi waliosafirisha bidhaa hiyo lakini wizara imekaa kimya hata baada ya mamlaka za China kuomba taarifa za mtandao wa biashara hiyo.

“Pembe za ndovu zenye uzito wa tani 4 kutoka nchini Tanzania na Kenya zimeripotiwa kukamatwa na vyombo vya usalama vya mamlaka ya jiji la Hong Kong hivi karibuni, huku zile zilizoibwa kutoka Tanzania zikiwa na thamani ya zaidi ya shilingi bilioni 5 lakini waziri hata hashtuki amekaa kimya”

Alisema wizi huo wa pembe za ndovu ni matokea ya waziri Kagasheki kuendelea kuwalinda watuhumiwa wakuu wa ujangili na kufanya danganya toto kwa kuwachukulia hatua watuhumiwa watatu tu wadogo, huku wale vigogo wa ujangili wakiachwa waendeleze ujangili kwa maslahi anayoyajua yeye na chama chake cha CCM.

“Kuendelea  kwa matukio ya ujangili ni ushahidi kuwa mabadiliko ya Mawaziri yaliyofanywa na Rais Kikwete kwa kuwatoa Maige na kumweka Kagasheki hayajazaa matunda yoyote, kwani udhaifu au ufisadi wa Kagasheki hauna tofauti yoyote ile na ule uliosababishwa na mtangulizi wake aliyeondolewa” alisema Msingwa.

Akitoa msimamo wake juu ya jambo hilo waziri huyo kivuli wa mali asili na utalii amesema wizara ya maliasili na utalii ni njia kubwa ya utoroshaji na wizi wa rasilimali za taifa na kwamba pamoja na mabadiliko ya mawaziri bado ufisadi unaendelea.

“Kwa mara nyingine tena napenda watanzania wafahamu kwamba uwendawazimu ni kufanya jambo lile lile kwa njia ile ile huku ukitengemea matokeo tofauti, kwa kadri muda unavyozidi kwenda wanyama pori na rasilimali nyingi za nchi hii zitaendelea kuibiwa na kuuawa, naomba rais achukue hatua za maksudi kunusuru hali hii” alisema Msigwa.

Chanzo: tabianchi blog