MAMA MAKETE AJISALIMISHA, AZIRAI

na Abdallah Khamis

LICHA ya aliyekuwa mwenyekiti wa UWT wilaya ya Kinondoni, Agnes Luvanda (Mama Makete), kujisalimisha Jeshi la Polisi Mkoa wa Kinondoni jana, hakuweza kuhojiwa kutokana na kupoteza fahamu ghafla mara baada ya kuelezwa sababu za kutafutwa kwake.

Habari kutoka chanzo cha ndani ya jeshi hilo, zilieleza kuwa baada ya Mama Makete kufika katika kituo cha polisi, Osterbay, alikutana na Kamanda wa Polisi wa mkoa huo, Charles Kenyela, na kuelezwa sababu za kutafutwa kwake.

Taarifa zinaeleza kuwa baada ya kufahamishwa madhumuni ya kutafutwa, mama huyo alisema kuwa hawezi kuongea akiwa peke yake mpaka atakapokuwa na wakili wake hali iliyomfanya Kamanda Kenyela kumpa fursa ya kumsubiri wakili wake.

Hata hivyo chanzo chetu kilieleza kuwa akiwa katika chumba cha kusubiria, hali yake ilianza kubadilika ghafla na kisha kupoteza fahamu jambo lililowafanya askari pamoja na ndugu zake wa karibu kumuwahisha katika Hospitali ya Masama iliyoko Mbezi Beach kwa matibabu.

Tanzania Daima iliwasiliana na Kamanda Kenyela kupata usahihi wa taarifa hizo ambapo alikiri akisema, “Unayonieleza ni kweli; huyu mama tulipomweleza sababu za kumtafuta aliomba awasiliane na wakili wake lakini baada ya muda tukaona anaishiwa nguvu na kisha kupoteza fahamu, hivyo tukamuwahisha hospitali,” alisema.

Kenyela alisema watamsubiri mama huyo awe katika hali nzuri ya kiafya ili wafanye mahojiano naye juu ya tuhuma zinazomkabili ambapo inadaiwa kuwa ameonekana katika picha za video akiwahimiza vijana kufanya vurugu na kisha wakavamie kituo cha polisi, Wazo Hill.

Hivi karibuni jeshi hilo, mkoa wa Kinondoni, lilitangaza kumsaka mama huyo baada ya kupatikana kwa picha za video zinazomuonyesha mtu anayedhaniwa kuwa yeye akiwahimiza vijana kuua hata mtu mmoja katika vurugu zilizotokea mwaka mmoja uliopita katika mtaa wa Mivumoni, kata ya Wazo Hill, na kusababisha vifo vya watu wawili.

Katika mfululizo wa picha hizo za video anaonekana mtu aliyevaa gauni la mawingu akisikika kuwahimiza vijana kuua na kisha kwenda kuvamia kituo cha polisi.

Baada ya muda wanaonekana vijana wakilishambulia gari kwa mawe na kisha wakamwendea mtu mmoja na kuanza kumshambulia kwa mapanga, rungu na shoka sehemu mbalimbali za mwili wake.

Mbali na matukio hayo yanayodaiwa kusababisha vifo vya watu wawili na majeruhi saba pia wanaonekana vijana wakiwa wamesogelea kituo cha Wazo hali inayowafanya polisi wa kituo hicho kuweka zuio kwa kutumia alama za kipolisi.

Na baada ya muda picha zinamuonyesha kwa ufasaha Anna Luvanda (mama Makete) akiongea kuelezea namna watu aliowaita wabomoaji wa maeneo yao walivyowafikia na wao kutoa taarifa kituo cha polisi bila kupata msaada wowote.

Chanzo: Tanzania Daima