Kala Jeremiah, Twanga Pepeta, Godzila, Jhiko Man kupagawisha ‘World Music Day’ leo ijumaa

Tamasha la muziki la kimataifa ambalo hufanyika kila mwaka la ‘World Music Day’ linafanyika leo (Ijumaa) katika viwanja vya posta Kijitonyama jijini Dar es Salaam ambapo wanamuziki Kala Jeremiah, Ben Paul, bendi ya Twanga pepeta na wengineo wanaotamba katika tasnia ya muziki nchini watalipamba tamasha hilo.

 

Tamasha hilo ambalo limeandaliwa na Umoja wa Ulaya wa taasisi za utamaduni (EUNIC) zikiwamo Aliance France-Dar es Salaam, Goethe Institut-Tanzania na British Council linalenga kutoa fursa kwa wanamuziki wakongwe na wachanga kukutana katika jukwaa hilo la kimataifa kutoa burudani hiyo kwa wapenzi na mashabiki wa muziki.

Mratibu wa Tamasha hilo Abel Shuma ambaye pia ni Mratibu wa Shughuli za Utamaduni Alliance France Dar es Salaam, anasema wanamuziki wengine watakaotumbuiza kwenye tamasha hilo ni pamoja na Godzila, Barnaba na bendi yake, mwanamuziki mkongwe wa Reggae Jhiko Man bila kusahau ngoma za asili kutoka kwa kundi la Super Maya Baikoko na Makini Kids. 

Kala analielezea onyesho hilo kama mazao ya kazi nzuri aliyoifanya katika muziki wake “Nimepata faraja sana kualikwa kutumbuiza kwenye world music day, inaonyesha ni kwa jinsi gani muziki wangu unakubalika na kutambulika kitaifa na kimataifa” anaeleza na kuongeza “Kupitia show hii naamini jina langu litakuwa juu na kuniletea show nyingine za kimataifa ndani na nje ya nchini”

Juma Nassoro aka Super Maya ambaye kiongozi wa kundi la Baikoko anasema “Tamasha hili tutalitumia kama kipaza sauti cha kutangaza muziki wetu wa asili kitaifa na kimataifa”

Shirika la ndege la FasJet kupitia kwa Afisa Masoko Mtendaji Lucy Mbogoro linajivunia kudhamini tamasha hilo likitumia nafasi hiyo kurejesha shukran kwa Watanzania kwa mchango wao mkubwa katika shirika hilo kwa kuchagua kutumia huduma zake za usafiri wa anga.

Mbogoro anasema “World Music Day ni fursa nzuri ya kukutana na wadau wetu kwakuwa tamasha litawakutanisha watu wa mataifa mengi watapata kujua huduma zetu katika wakati huu tunaoelekea kuanzisha safari za ndege za kimataifa katika nchi za Afrika Kusini, Zambia na Rwanda”

Tamasha hilo ambalo limeandaliwa na European Union National Institutes For Culture (EUNIC), ikiwemo Goethe Institut Tanzania, Alliance Francaise na British Council pia limedhaminiwa na Pepsi, Total na balozi za Ujerumani na Ufaransa.