Deni la taifa lafikia trilioni 27/-

WIZARA ya Fedha imesema deni la taifa limepanda hadi kufikia dola za Marekani bilioni 17.10 sawa na sh. trilioni 27. 04 ilipofika Desemba, mwaka jana.

Hayo yamebainishwa Dar es Salaam jana na Waziri wa Fedha, Saada Mkuya, wakati akizungumza na waandishi wa habari ikiwa ni mara ya kwanza tangu ateuliwe kuwa waziri wa wizara hiyo.
Alisema kati ya deni hilo, deni la nje ni dola za Marekani bilioni 12.79 sawa na sh.trilioni 20.23. Alitaja sababu za kuongezeka kwa deni hilo ni mikopo iliyopokelewa na Serikali na ambayo muda wake wakulipa haujafika kutoka vyanzo vya masharti nafuu na ya kibiashara na malimbikizo ya riba ya deni la nje.
Alisema Septemba mwaka jana Serikali ilifanya tathmini ya kupima na kuangalia uhimilivu wa deni la Taifa kwa kutumia vigezo vilivyowekwa na kutambuliwa na Taasisi za kimataifa na matokeo ya tathmini hiyo yanaonesha kwamba deni la taifa ni himilivu.
 Waziri Mkuya alisema hiyo ni kwa sababu viashiria vyote vilivyowekwa kimataifa, kwani bado viko chini ya ukomo unaotakiwa.
"Hatua tulizochukua kuhakikisha uhimilivu wa deni la taifa ni kuhakikisha kwamba mikopo inayopewa kipaumbele ni ile yenye masharti nafuu na mikopo hiyo inatumika kwenye maeneo ambayo yana vichocheo vya ukuaji wa miundombinu ikiwemo miundombinu ya barabara, mawasiliano, bomba la gesi na uwanja wa ndege wa kimataifa wa Zanzibar," alisema Mkuya.
Aidha aliongeza kuwa Serikali inatoa kipaumbele kwa miradi ya ubia kati ya Serikali na sekta binafsi ili kuiwezesha sekta binafsi kuchangia maendeleo ya uchumi wa nchi na kuipunguzia Serikali mzigo wa deni.
Akiongelea kuhusiana na matumizi ya mashine za kielektroniki (EFD), alisema kuwa hilo ni suala muhimu ambalo wanaendelea kulitolea ufafanuzi na kulisimamia vyema kwa madhumuni ya kukusanya kodi kwa ufanisi zaidi ili kuongeza pato la taifa na kupunguza ukwepaji kodi.
Alisema kuwa mamlaka ya mapato (TRA) wataendelea kutoa elimu ya matumizi ya mashine hizo kwa wafanyabiashara pia makubaliano kati ya serikali na viongozi wa wafanyabiashara kuwa muda wa kuanza kutumia mashine usogezwe hadi leo ili kuwapatia wananchi muda wa kutosha kujiandaa na utekelezaji wa matumizi ya mashine.
Aidha alitoa wito kwa wadau kutoa ushirikiano wa dhati katika utekelezaji wa azma hii ya kuboresha mapato ya Serikali na kutekeleza malengo mbalimbali ya kimaendeleo

Chanzo;Majira