JIJI LASHINDWA KUTEGUA KITENDAWILI STENDI MABASI YAENDAYO MIKOANI.

 

Meya wa Jiji la Dar es Salaam, Didas Masaburi.

Matarajio ya kuanza kwa ujenzi wa stendi kubwa ya mabasi yaendayo mikoani katika eneo la Mbezi Luis, mwezi ujao huenda ikawa ndoto kutokana na ukweli kwamba hakuna maandalizi yoyote yanayofanyika.

Msemaji wa Halmashauri ya Jiji la Dar es Salaam, Gaston Makwembe, aliwahi kunukuliwa na vyombo vya habari (siyo gazeti hili), kuwa ujenzi wa kituo hicho unatarajiwa kuanza mwezi ujao na kwamba maandalizi yalikuwa yanaendelea.

Stendi hiyo ambayo imekuwapo eneo la Ubungo tangu miaka ya katikati ya tisini inalazimika kuhamishwa kwa kuwa sehemu kubwa ya eneo lake imemegwa kwa ajili ya ujenzi wa miundombinu ya mabasi yaendayo haraka (Dart), hivyo kubakiwa na eneo dogo lisilokidhi mahitaji.

NIPASHE lilitembelea eneo hilo ambalo stendi inatarajiwa kuhamishiwa na kukuta halijafanyiwa maandalizi yoyote huku likiwa na milima, mabonde na vichaka vinavyohatarisha usalama wa wakazi waliopo jirani na eneo hilo.

Wakizungumza kwa nyakati tofauti, wakazi hao walisema eneo hilo kwa sasa ni hatarishi kutokana na vibaka kujificha na kufanya uhalifu nyakati za usiku ikiwamo ubakaji.

Aldo Mkande maarufu kama Mnyal’ alisema eneo hilo limekaa wazi kwa muda mrefu na serikali hadi sasa haijamaliza kuwalipa fidia wakazi wa eneo hilo.

“Mimi eneo langu sijalipwa bado na serikali haijanifuata wala sijapewa barua ninasikia tu kutoka kwa watu kuwa serikali inahitaji kuhamishia stendi ya mabasi katika eneo hili,” alisema Mkande.

Naye Khadija Salum, alisema mwaka jana serikali iliweka nguzo zinazoonyesha mpaka wa eneo hilo lakini kwa hivi sasa nguzo hizo hazipo baada ya kuibwa na vibaka.

Baadhi ya wakazi ambao hawakutaka kutaja majina yao walieleza kuwa serikali haikuwa makini na ujenzi wa kituo hicho bali kunaufisadi unaendelea wa ‘kutafuna’ fedha za Watanzania.

NIPASHE lilipofika eneo hilo liliwakuta vijana wakicheza mpira wa miguu, pamoja na biashara ya ununuzi wa chupa za plastiki ukiendelea.

Eneo hilo limekuwa kwenye mgogoro kwa muda mrefu kati ya wakazi wa eneo hilo na serikali, baada ya wakazi hao kufungua kesi mahakamani kupinga fidia ndogo waliyokuwa wanalipwa.

Wakazi hao walipata nguvu kubwa zaidi mwaka juzi baada ya kushinda kwa kishindo kesi yao namba 80 ya mwaka 2005 iliyowasilishwa Mahakama Kuu ya Ardhi Jijini Dar es Salaam.

Kwenye kesi hiyo iliyofunguliwa Mahakama Kuu, Kitengo cha Ardhi na Proches Eleza Tarimo na wenzake 72, dhidi ya Katibu Mkuu wa Wizara ya Ujenzi na Mwanasheria Mkuu wa Serikali, mahakama ilitambua kuwa wanamiliki maeneo yao kihalali.

Pamoja na mambo mengine, hukumu hiyo inaitaka serikali kulipa fidia kwa wenye maeneo hayo kama inataka kuyatwaa kulingana na sheria ya ardhi ya vijiji ya mwaka 1999

Wakati hukumu ikisema hivyo, Meya wa Jiji la Dar es Salaam, Didas Masaburi, aliwahi kunukuliwa na gazeti hili kuwa Halmashauri ya jiji la Dar es Salaam ndiyo mmiliki halali wa maeneo hayo na kwamba wanaendelea na mchakato wa kuandaa michoro kwa ajili ya ujenzi wa stendi hiyo ikikadiriwa kugharimu Sh. bilioni sita katika hatua za awali.

CHANZO: NIPASHE

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.