Moovn Tanzania Limited yaboresha huduma za usafiri.

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

Na Jacquiline Mrisho - MAELEZO

Kampuni ya Moovn Tanzania Limited imeboresha huduma za usafiri na kuongeza usalama wa wateja kwa kuanzisha huduma za usafiri zinazopatikana kwa njia ya mtandao.

Hayo yamesemwa leo Jijini Dar es Salaam na Mkurugenzi Mkuu wa Kampuni hiyo,Bw.Godwin Ndugulile alipokua akiwaelekeza waandishi wa habari jinsi ya kujiunga na huduma za usafiri kwa njia ya mtandao.

“Huduma zetu za usafiri zinapatikana kwa njia ya simu na tovuti kupitia program za aina tatu ambazo ni programu inayomuhusu mteja,(Moovn Passenger), programu inayomuhusu dereva (Moovn Driver) pamoja na Programu inayohusiana na mashirika au makampuni ya kibiashara”alisema  Bw.Ndugulile.

Bw.Ndugulile ameongeza kuwa huduma hizo zinapatikana bure kwa wateja wote pia kampuni inashirikiana na madereva wa vyombo vya usafiri wa aina zote zikiwemo taxi, pikipiki, na bajaji ili kutoa huduma nafuu kwa wateja wao.

Aidha, Bw. Ndugulile amezitaja baadhi ya faida zinazopatikana kwa kutumia huduma hii kuwa ni; usafiri wa uhakika kwa kuwa madereva wote  wana leseni na wamesajiliwa, usalama, bei nafuu kulingana na mahitaji na uwezo wa mteja, pamoja na kuongeza ajira na kipato  kwa madereva.

Kampuni ya Moovn Tanzania Limited imeanza kufanya kazi rasmi Machi 16 Mwaka huu, Ofisi zake zinapatikana maeneo ya Osterbay Jijini Dar es Salaam pia Kampuni ina mpango wa kufungua matawi mengine nchi nzima.