IDARA YA WANYAPORI YAPATA VIGOGO WAPYA

na Asha Bani

KATIBU Mkuu wa Wizara ya Maliasili na Utalii, Maimuna Tarishi, amemteua Profesa Alexander Songorwa kuwa Mkurugenzi mpya wa Idara ya Wanyamapori, akichukua nafasi ya Obeid Mbangwa, aliyetimuliwa kazi na Khamis Kagasheki.

Msaidizi wa Mbangwa ni Bonaventura Midala na watendaji wengine ambao walisimamishwa kazi baada ya kubainika kuhusika katika kashfa ya utoroshaji wanyamapori hai kupitia Uwanja wa Ndege wa Kimataifa wa Kilimanjaro (KIA) kwenda nje.

Taarifa ya Katibu Mkuu kwa vyombo vya habari, iliyotolewa jana na msemaji mkuu wa wizara hiyo, George Matiko, ilieleza kuwa kabla ya utezi huo, Prof. Songorwa alikuwa Profesa Mshiriki katika Usimamizi wa Wanyamapori, Chuo Kikuu cha Sokoine cha Kilimo (SUA) cha Morogoro na alikuwa Mkuu wa Idara hiyo ya usimamizi wa Wanyamapori chuoni hapo.

Tarishi pia amemteua Profesa Jafari Kideghesho kuwa Mkurugenzi Msaidizi, kuiongoza sehemu ya matumizi endelevu ya wanyamapori.

Uteuzi huo umefanyika baada ya vigogo watatu kugundulika kuhusika katika kashfa hiyo ambapo wanadaiwa kusafirisha wanyamapori hai 116 na ndege 16 Novemba 24 mwaka 2010, kwenda nje ya nchi kupitia KIA.

Wengine waliohusika katika sakata hilo ni Simon Charles Gwera, Ofisa Uwindaji wa Kitalii Cites na Utalii wa Picha – Arusha, na Frank Mremi, Ofisa Uwindaji wa Kitalii Cites na Utalii wa Picha-Arusha.

Taarifa ya uteuzi huo ilifafanua kuwa Katibu Mkuu ameufanya kwa mamlaka aliyonayo kwa mujibu wa kifungu cha 6(1) (b) cha Sheria ya Utumishi wa Umma Na. 8 ya mwaka 2002 ambapo utekelezaji wake utaanza mara moja kuanzia kesho.

Akielezea wasifu wa Prof. Songorwa, alisema ana shahada ya kwanza (B.Sc.) ya sayansi katika zoolojia na ekolojia ya wanyamapori ya Chuo Kikuu cha Dar es salaam (mwaka 1987), shahada ya uzamili (MSc) katika Mipango na Maendeleo Vijijini ya Chuo Kikuu cha Guelph, Ontario, Canada (1994).

Aidha, anayo shahada ya uzamivu (PhD) katika Uhifadhi Maliasili ya Chuo Kikuu cha Lincoln, New Zealand (1999) kabla ya kujiunga na SUA mwaka 2001, Prof. Songorwa alikuwa mwajiriwa wa Idara ya Wanyamapori katika Wizara ya Maliasili kuanzia mwaka 1982.

Akiwa wizarani hapo alikuwa akitumikia nafasi mbalimbali zikiwemo Askari Wanyamapori, Mkuu wa Kanda na msaidizi wa mkuu wa mradi katika Pori la Akiba la Selous.

Naye Prof. Kideghesho si mgeni katika Idara ya Wanyamapori ambapo kabla ya kujiunga na SUA mwaka 1999 alikuwa mwalimu katika Chuo cha Usimamizi wa Wanyamapori Mweka (CAWM-Mweka) Moshi kuanzia 1993.

Kitaaluma Prof. Kideghesho ana shahada ya kwaza (B.Sc.) katika Kilimo ya SUA (1993), Shahada ya Uzamili (MSc) katika Biolojia ya Uhifadhi ya Chuo Kikuu cha Kent, Uingereza (1996), na Shahada ya Uzamivu (PhD) ya Chuo Kikuu cha Sayansi na Teknolojia cha Norway kilichopo mjini Trondheim (2006).

Chanzo: Tanzania Daima