MATENGENEZO YA RADA YAKAMILIKA

Na Mwandishi wetu

Matengenezo  ya rada ya kuongozea ndege katika Uwanja wa Ndege wa Kimataifa wa Julius Nyerere (JNIA) iliyoharibika mwanzoni mwa Oktoba, mwaka huu, yamekamilika, huku mtaalamu kutoka Afrika Kusini akiifanyia ukaguzi wa kina zaidi.

Matengenezo ya rada hiyo yaliyofanywa na mtaalamu kutoka nchini Kenya, yalikamilika juzi.

Hadi kufikia jana, mtaalamu mwingine kutoka Afrika ya Kusini alikuwa anaikagua ili kubaini tatizo linalosababisha vifaa vilivyomo ndani ya rada hiyo kuharibika kila mara, pamoja na kuikagua kama matengenezo hayo yalifanyika vizuri.

Akizungumza na NIPASHE kwa njia ya simu jana, Mkurugenzi Mkuu wa Mamlaka ya Viwanja vya Ndege, Fadhili Manongi, alisema matengenezo ya kifaa kilichoharibika yamekamilika.

Alisema zoezi linalofanyika kwa sasa (jana), ni kuifanyia uchunguzi wa kina unaofanywa na mtaalamu kutoka Afrika Kusini.

“Matengenezo yamekamilika jana (juzi) jioni na leo (jana) mtaalamu kutoka Afrika Kusini anaikagua. Tunatarajia kuiwasha majira ya jioni. Kuna rada aina ya “Primary” na “Secondary”. Sasa primary inafanya kazi. Ila Secondary tumeizima na tunatarajia kuiwasha jioni,” alisema Manongi.

Rada hiyo iliharibika kufuatia kifaa kilichopo kinachotumika kusambazia umeme kiitwacho UPS au “Power Suply” kuungua zaidi ya wiki mbili iliyopita na tatizo ndani ya rada hiyo lilianza kuonekana tangu siku walipoifanyia ukarabati (Agosti 18, mwaka huu) kwa kuanza kuonyesha taa nyekundu ikiashiria kuna hitilafu ndani ya chombo hicho.

 

Chanzo: Nipashe