NYILAWILA: CHEKA ALINICHEZEA RAFU

Na Amina Athumani

BONDIA wa ngumi za kulipwa nchini, Karama Nyilawila amesema kushinda kwa Francis Cheka, katika pambano lao si kwamba aliishiwa punzi bali ni kutokana na rafu nyingi alizofanyiwa na mpinzani wake.

Nyilawila alipigwa kwa KO raundi ya sita na Cheka katika pambano la kuwania ubingwa wa mabara (UBO) uzito wa kg. 75, lililofanika mwishoni mwa wiki katika Ukumbi wa PTA sabasaba, Dar es Salaam.

Akizungumza mara baada ya pambano hilo, Nyilawila alisema faulo alizofanyiwa na Cheka ndizo zilizomfanya asalimu amri na ameamua kukubali yaishe.

Kwa upande wake Cheka alisema siri ya yeye kushinda mapambano anayoandaliwa ni kutokana na kufanya mazoezi mengi, hali inayomjengea kujiamini akiwa ulingoni.

Pia alisema kumpiga Nyilawila, kutamaliza minong'ono ya watu waliokuwa wakisema mengi juu yake siku za hivi karibuni.

Cheka ambaye pia ameitaka serikali na wadau wa michezo kuwekeza udhamini katika mchezo huo ni pambano lake la pili kupigana na Nyilawila.

Katika pambano la awali kati yake na Nyilawila lilifanyika mjini Morogoro na Cheka kushinda kwa pointi, hivyo kuandaliwa la marudiano kumaliza ubishi kutokana na baadhi ya watu kudai waamuzi wanampendelea bingwa huyo.

Bondia huyo kwa sasa amejipanga kupambana na mabondia kutoka nje ya nchi kwa kuwa hapa nchini hana mpinzani.

Chanzo: Majira