GUNINITA MAKAMU MWENYEKITI MISS UTALII

na Eliwaza Emmanuel.

MWENYEKITI wa zamani wa Chama cha Mapinduzi (CCM), Mkoa wa Dar es Salaam, John Guninita, ameteuliwa kuwa Makamu Mwenyekiti wa Bodi ya Shindano la Miss Utalii Tanzania.

Rais wa shindano hilo la Miss Utalii Tanzania, Gideon Chipungahelo, jana alithibitisha kufanyika uteuzi huo, akibainisha kuwa umefanyika kutokana na mabadiliko ya mfumo wa uongozi uliofanywa katika bodi hiyo.

“Hatua hii ni moja ya utekelezaji wa mpango mkakati wa kuimarisha shindano letu na uongozi kwa ujumla na uteuzi huu utakuwa wa kipindi cha miaka mitatu kuanzia Oktoba 22, mwaka huu,” alisema.

Chipungahelo alisema kuteuliwa huko kwa Guninita, kumetokana na bodi hiyo kuzingatia busara, hekima na uzoefu mkubwa alionao katika uongozi wa jamii na jumuia mbalimbali za kitaifa na kimataifa.

Akifafanua kuhusiana na mabadiliko hayo, Chipungahelo alisema mfumo huo mpya wa uongozi, umefanyika kwa lengo la kuimarisha uongozi, pia ni hatua ya kulifanya shindano la Miss Utalii Tanzania kuwa bora na kubwa ndani na nje ya nchi.

Kwa mujibu wa rais huyo, kuwepo wa Guninita kwenye bodi hiyo kama Makamu Mwenyekiti, sambamba na Mwenyekiti wake, Mwanahabari mkongwe, Mikidadi Mahamoud, na wajumbe wengine wateule wa bodi hiyo, kutafungua ukurasa mpya kwa mashindano hayo.

Chanzo: Tanzania Daima