SERIKALI YATAJA MBINU KUKABILI UHABA WA MAFUTA NCHINI

Bakari Kiango

SERIKALI imeanisha mikakati mipya itayosaidia kukabiliana na tatizo la uhaba wa mafuta na kwa kuanzia limetoa mwongozo kwa Shirika la Maendeleo la Petroli Tanzania(TPDC), kuhakikisha wakati wote linahifadhi mafuta ya akiba.

Waziri wa Nishati na Madini, Profesa Sospeter Muhongo amesema kuwa hatua hiyo inakuja ili kukabiliana na tatizo la ukosefu wa mafuta, kama lilivyoshuhudiwa siku za hivi karibuni na kuwasababishia wananchi usumbufu.

Profesa Muhongo ambaye alikuwa akizungumza kwenye kipindi cha dakika 45 kinachorushwa na Kituo cha ITV, alisema kuanzia sasa TPDC itahakisha iinaweka akiba ya mafuta kukabili dharura yoyote inayoweza kujitokeza.

“ Kuanzia sasa serikali inaanzisha utaratibu mpya, tunataka kuona shirika letu hilo linakuwa na mafuta ya akiba wakati wote ile mambo kama yale yakijitokeza basi linaingilia kati na kusaidia,” alisema Muhongo.

Alieleza kuwa nia ya Serikali ni kuhakikisha inaondokana kabisa na tatizo la ukosefu wa mafuta na inaendelea kuchunguza mwenendo wa soko, ili kujiwekea mipango endelevu itayosaidia kukabiliana na tatizo lolote.

Kauli ya Waziri Muhogo imekuja siku chache tu baada ya maeneo mengi kukabiliwa na uhaba wa nishati ya mafuta aina ya petroli yaliyoadimika kwa muda wa wiki moja.

Hali ililiripotiwa kuwa mbaya katika mikoa kadhaa ikiwemo Dar es Salaam, Njombe, Ruvuma na mikoa iliyoko Kanda ya Ziwa na ile ya Kaskazini.

Mamlaka ya Udhibiti wa Huduma za Nishati na Maji(Ewura), ilisema  tatizo la uhaba wa nishati hiyo ilitokana na kuchelewa kuwasili kwa meli zilizotegemewa kushusha mafuta.

Hata hivyo mamlaka hiyo imewatoa hofu wananchi ikisema kuwa meli kadhaa tayari zimeanza kushusha  mafuta na baadhi yamepelekwa mikoani hasa ile iliyokumbwa na uhaba mkubwa.

Kwa upande mwingine Serikali ilitishia kuzifutia leseni kampuni zinazojihusisha na uuzaji wa bidhaa hiyo kwa madai kuingia njama ya kutosambaza kwa makusudi nishati hiyo.

 Takwimu zinaonyesha kuwa mahitaji ya pertoli nchini kwa siku ni lita 1.7ml, dizeli 3.5ml, mafuta mazito1.1ml  na 200,000 na mafuta ya taa ni 400,000.

Kuhusu gesi Muhongo alisema wizara yake imeka utaratibu maalumu kwa wachimbaji wadogo, ili waweze kunufaika na  madini kuliko kulalamika Serikali haiwajali wachimbaji hao.

Kwa mujibu wa Muhongo wizara itaanzisha vipindi maalumu kuhusu mambo ya gesi kupitia vyombo vya habari, ili kuwaelimisha wananchi na itakuwa kwa mwaka mzima.

Chanzo: Mwananchi