Hii Mpya: Dawasco kufunga Luku za maji

Dar es Salaam. Mamlaka ya Majisafi na Majitaka Dar es Salaam (Dawasco), wiki ijayo inatarajia kuanza kufunga luku za maji kwa wateja wake, ili walipe kadiri wanavyotumia.

Ofisa Mtendaji Mkuu wa Dawasco, Jackson Midala, alisema hayo jana alipozungumza kwenye hafla ya kuzindua utaratibu wa kulipa fedha kwa kutumia mitandao mbalimbali ya simu na benki badala ya kwenda ofisi za Dawasco.

Midala alisema kuanzia wiki ijayo mamlaka yake itaanza kuwafungia wateja wake luku maalumu, kwa ajili ya kuongeza ufanisi kwenye ukusanyaji mapato. Dawasco hivi sasa ina wateja 130,000.

“Kuanzia wiki ijayo Dawasco itaanza kufunga teknolojia mpya ya luku kwenye nyumba na wateja wakubwa kama viwanda, mteja atalipa kulingana na atakavyotumia,” alisema Midala.

Midala alisema mabadiliko hayo yanalenga kuboresha huduma kwa wateja. Dawasco imeamua kutumia benki na simu za mkononi kurahisisha makusanyo yake.

CHANZO HABARI LEO