Chiza aeleza mkakati sekta ya kilimo

WAZIRI wa Kilimo , Chakula na ushirika
Mhandisi Christopher Chiza ameeleza mikakati
inayofanywa na wizara hiyo kwa kuinua sekta ya kilimo hapa nchini.
Akizungumza na Majira jana Dar es Salaam Chiza alisema Wizara ya Kilimo kwa kipindi kirefu imepita katika changamoto ila kwa sasa
inaleta matumaini kutokana na kasi iliyopo ya kuwanufaisha wakulima wa ngazi zote.
Chiza alieleza kuwa wamekuwa wakiwaelimisha wakulima na wawekezaji kuhusu ardhi kutokana
na propaganda zinazoenezwa kwa wawekezaji wakubwa ukiwekeza katika ardhi ya Tanzania
unanyang’anywa na kutolewa kwa wakulima wadogo jambo ambalo si la kweli.
“Hizo taarifa hazina ukweli wowote kwamba sana sana ni kuharibu sifa ya nchi cha msingi ni wawekezaji kufika kwa wingi ili tupate mafanikio kwa kupata ajira na hata kuongeza uchumi wa nchi,” alisema.
Waziri Chiza alisema hivi sasa serikali ipo katika harakati mbalimbali za kuhakikisha kuwa kilimo hapa nchini kinaendelezwa ikiwa ni pamoja na kuzungumza na wawekezaji ili kuwaendeleza
wakulima.
“Nachotaka hivi sasa Watanzania wafahamu kwa sasa tumezungumza na Kampuni ya Tanzania Investment Centre (TIC) ambao wao wanachukua ardhi halafu wanawakodisha wawekezaji ambao wakimaliza kilimo ardhi inabaki kuwa ya serikali,” alisema Chiza.
Aliendelea kufafanua kuwa “mpaka sasa TIC ina ekari 185,000 huko Mkulanzi mkoani Morogoro
na eka 20,000 wamezigawa kwa ajili ya kilimo cha miwa na 5,000 kwa ajili ya kilimo cha mpunga ambapo tayari wawekezaji wameanza kujitokeza kwa wingi.”
Chiza aliiomba TIC washirikiane na Wizara ya Kilimo ili kuweza kuinua matumaini ya wakulima Watanzania waliokuwa wameanza
kukata tamaa kutokana na kilimo kuwa na changamoto nyingi.
Hata hivyo Chiza alisema anajua zipo changamoto katika kufikia Mpango wa Matokeo Makubwa Sasa (Big Result Now) ila anafarijika kutokana na wakulima sasa kuanza kuelewa umuhimu wa mpango huo

Chanzo;Mwananchi