WEF yaitaja Tanzania kunufaika kiuchumi

Mkutano wa Jukwaa la Kimataifa la Uchumi (WEF) umeitaja Tanzania kuwa miongoni mwa nchi zitakazonufaika na miradi 16 barani Afrika ambayo imepewa kipaumbele kutokana na kuzishirikisha sekta binafsi katika ujenzi wa miundombinu.

Akitoa taarifa za mkutano huo kwa waandishi wa habari jijini Dar es Salaam jana, Waziri wa Uchukuzi, Dk Harrison Mwakyembe alisema Tanzania itanufaika kupitia Mradi wa Ukanda wa Uchukuzi wa Kati (Central Transport Corridor) ambao unaiunganisha Bandari ya Dar es Salaam na nchi za Rwanda, Burundi na Uganda kupitia Bandari Kavu ya Isaka, Maziwa ya Tanganyika na Victoria.

Alisema Tanzania imefanikiwa kupata nafasi hiyo baada ya kufanikiwa kuingia katika miradi 16 bora kati ya 51 iliyoshindania nafasi hiyo na kwamba mipango bora ya serikali ndiyo iliyofanikisha uteuzi huo na kwamba baadhi ya marais waliokuwapo katika mkutano huo walionyesha kutokuridhishwa na uamuzi uliofikiwa.

“Mara nyingi Watanzania makubwa yanayofanyika katika nchi yetu huwa hatuyachukulii kwa umaniki. Tunapenda tu kuona mabaya, lakini kwa wenzetu hiki ni kitu kikubwa kupita kiasi, siyo kwamba tumependelewa, mimi ninachofahamu tunasifa,” alisema Mwakyembe.

Alivitaja vigezo vikubwa viwili vilivyotumika kuichagua Tanzania kuwa ni mikakati mizuri iliyoainishwa na serikali kupitia Mpango wake wa Matokeo Makubwa Sasa (BRN) ya kuendeleza ukanda wa uchukuzi wa Kati na msimamo wa serikali katika kufuatilia mipango yake.

Mwakyembe alifafanua kuwa, Mwenyekiti wa Mkutano huo uliofanyika Davos, Uswiss, Waziri Mkuu wa zamani wa Uingireza, Gordon Brown alisema miradi iliyoteuliwa itaendelezwa kwa viwango vya kimataifa, ili iwe mifano kwa miradi mingine ya miundo mbinu barani Afrika.

Warsha ya maandalizi ya utekelezaji wa miradi hiyo inatarajiwa kufanyika nchini wiki ya kwanza ya Aprili, ambapo Rais wa Jamhuri ya Muungano wa Tanzania, Jakaya Kikwete anatarajiwa kuwa mgeni rasmi.

Katika kufanisha mradi huo, Waziri Mkuu, Mizengo Pinda anatarajiwa kuunda kamati ndogo ya kifaifa ya wajumbe wanane watakaosimamia mradi huo.

Mei 2012, Jukwaa la Kimataifa la Uchumi kwa Bara la Afrika lilikutana Addis Ababa, Ethiopia, ambapo lilianzisha mkakati wa kuhusisha sekta binafsi katika ujenzi wa miundombinu katika bara hilo

Chanzo;Mwananchi