Pinda: Tanzania yashuka viwango kibiashara

Waziri Mkuu, Mizengo Pinda amesema Tanzania imeshuka kwa nafasi tisa katika orodha ya nchi zinazofanya biashara duniani zilizopo kwenye viwango vya Benki ya Dunia (WB) na kwa sasa inashika nafasi ya 145 kati ya nchi 189.

Akizungumza juzi katika  Uzinduzi wa Ripoti ya Mapitio ya Sera ya Uwekezaji nchini, Waziri Pinda alisema Tanzania inaweza kunufaika katika uwekezaji kama itatekeleza kikamilifu mapitio ya Mfumo wa Uwekezaji yaliyowasilishwa na Taasisi ya Ushirikiano wa Kiuchumi na Maendeleo (OECD) katika Ripoti ya Mapitio  ya Sera ya Uwekezaji.

“Ripoti inaonyesha Tanzania imeshuka nafasi tisa na inaeleza maeneo yenye changamoto na kuchangia kushuka kwa ufanyaji wa biashara ambao ni pamoja na upatikanaji wa mikopo, rushwa, vibali, biashara mipakani, ulipaji kodi na usajiliwa ardhi na mali,” alisema Pinda.

Katika hotuba yake Pinda aliwataka watendaji wa Serikali kupitia kwa kina mapitio ya ripoti hiyo na kutumia mapendekezo yake ili kufikia malengo ya uwekezaji yaliyowekwa katika Mpango wa Matokeo Makubwa Sasa (BRN).

Alifafanua kuwa ili kukabiliana na changamoto hizo, Serikali imeanzisha kituo katika Bandari ya Dar es Salaam ili kuondoa vikwazo katika barabara kubwa na kurahisisha ulipaji kodi.

Alisema malengo ya mapitio ya ripoti hiyo ni kuboresha hali ya uwekezaji na biashara nchini ambayo matokeo yake yatasaidia kuongeza wawekezaji.
Chanzo;Mwananchi