AKDN kuwekeza trilioni elimu, afya

Mtandao wa Maendeleo wa Aga Khan (AKDN) umedhamiria kufanya uwekezaji unaofikia kiasi cha Dola za Marekani bilioni moja sawa na Shkatika kipindi cha miaka michache ijayo.

Uwekezaji huo, ambao sehemu yake tayari umeshaanza, utaelekezwa katika sekta za afya na elimu.

Taarifa iliyotolewa mwishoni mwa wiki, inasema kuwa AKDN imepanga kuwekeza kiasi cha Dola 800 milioni kwa ajili ya upanuzi wa Chuo Kikuu cha Aga Khan kilichopo Arusha; Dola 80 milioni kwa ajili ya awamu ya pili ya upanuzi wa Hospitali ya Aga Khan iliyopo Dar es Salaam na kiasi kingine cha Dola 30 milioni zitatumika kuimarisha Aga Khan Academy iliyopo Dar es Salaam.

Uwekezaji huu ni pamoja na uwekezaji mwingine katika maeneo mbalimbali, ikiwemo kuwawezesha wakulima katika Mikoa ya Kusini mwa Tanzania na wameweza kuongeza uzalishaji kwa takriban mara tatu zaidi baada ya kuanza kupokea msaada kutoka AKDN.

Taarifa kuhusiana na uwekezaji huo zinakuja wakati taasisi hiyo imeandaa maonyesho makubwa yanayofunguliwa jijini Dar es Salaam Jumamosi ijayo.

Pamoja na wageni wengine, maonyesho hayo yatatembelewa kwa nyakati tofauti na Makamu wa Rais, Dk Mohammed Gharib Bilal, Waziri Mkuu, Mizengo Pinda na Rais mstaafu, Ali Hassan Mwinyi.

Maonyesho hayo yenye kaulimbiu isemayo ‘Rays of Light; Glimpses into the Ismaili Imamati’ yanalenga kuonyesha jitihada za Mtukufu Karim Aga Khan kuisaidia jamii katika kipindi cha miaka 50 iliyopita.

Maonyesho kama hayo tayari yameshafanyika Paris, Dubai, Lisbon, Uganda, Canada na Marekani katika pia kusheherekea miaka 1,400 ya historia ya madhehebu hayo duniani.

“Kwa kuwa Tanzania ni moja ya nchi zenye uwekezaji mkubwa ikiwamo Chuo Kikuu cha Aga Khan kule Arusha, Aga Khan Academy jijini Dar es Salaam na awamu ya pili ya upanuzi wa Hospitali ya Aga Khan, maonyesho haya yatasaidia kutoa mwanga wa nini Mtukufu Aga Khan amekuwa akifanya kama Kiongozi Mkuu wa Shia Imami Ismaili,” alisema Jehangir Bhaloo, Rais wa Kamati ya Aga Khan nchini Tanzania.

Kituo cha Matibabu ya Saratani kilichofunguliwa katika Hospitali ya Aga Khan wiki iliyopita ni moja ya uwekezaji mkubwa unaofanywa na AKDN nchini.

Pamoja na mambo mengine, upanuzi huo utahusisha pia vitengo vya  upasuaji, magonjwa ya moyo, sayansi ya mishipa ya fahamu, huduma muhimu na afya ya mama na mtoto.

Akizungumza wakati wa uzinduzi wa kituo hicho, Princess Zahra Aga Khan, alisema  upanuzi huo utahusisha ujenzi katika eneo lenye ukubwa wa meta za mraba 13,000 na ukarabati katika eneo lenye ukubwa wa meta za mraba 6,000.
Chanzo;Mwananchi