SEKTA YA UCHUKUZI YAKUZA UCHUMI

 

Meja Generali Joseph Kapwani. 

Sekta ya uchukuzi na usafirishaji imezidi kukua hususani anga kuongoza katika kuongeza uchumi wa taifa.

 

Hali hiyo inatokana na kuongezeka kwa mashirika zaidi ya 40 yaliyosajiliwa nchini kuratibu shughuli za usafiri wa anga.

 

Hayo yamesemwa jana na Meja Generali Joseph Kapwani, Mkuu wa Kamandi ya Jeshi  la Anga aliyemwakilisha Mkuu wa Majeshi ya Ulinzi na Usalama, aliyekuwa mgeni rasmi katika sherehe za uwekaji wa jiwe la msingi wa Hanga la Chuo cha Taifa cha Usafirishaji (NIT) na maadhimisho ya miaka ya 40 ya chuo hiko.  

 

Jenerali Kapwani alisema kuanzishwa kwa jengo hilo ambalo litakuwa la kwanza nchini Tanzania kutoa  kozi ya uhandisi wa kutengeneza ndege na urubani ni jambo jema na hatua kubwa na muhimu ya kimaendeleo kwa taifa.

 

Alisisitiza kuwa uanzishwaji wa kozi hiyo ya  utaongeza wataalamu na kuimarisha ufanisi wa kiutendaji sambamba na kukuza uchumi wa taifa kwani wadau wengi na watumiaji wa huduma za usafiri wa anga watanufaika.

 

“Ili anga liwe salama linahitaji kuwepo na vyombo imara kama ndege ambazi ubora wake unategemea sana utaalamu wa wahandisi waliofunzwa vizuri na kuielewa vyema fani hiyo.” alisema Generali Kapwani.

 

Mkuu wa chuo hiko, Dk. Zacharia Mganilwa, alisema kuwa sekta ya anga ni nyeti katika uchumi wa nchi, ikisimamiwa vizuri kwa kuwa na wataalamu wenye weledi, inaweza ikaongeza kwa kiasi kikubwa pato la taifa.

 

Aliongeza kuwa upande wa marubani wazawa kwa Tanzania idadi hairidhishi kutokana na takwimu zinazoonyesha kuwa mpaka  Juni, 2014 Tanzania ilikuwa na marubani 533 na kati ya hao, 239 ni wazawa na waliobakia 294 ni wageni. 

 

CHANZO: NIPASHE

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.