UCHAGUZI MKUU 2015: WATOA RUSHWA WATOSWE-BILAL

 MAKAMU wa Rais Dkt. Mohamed Gharib Bilal, amewataka Watanzania wasikubali kuchagua viongozi wanaotoa rushwa ili kutaka uongozi katika Uchaguzi Mkuu badala yake wachague viongozi wenye maadili na hofu ya Mungu.

Dkt. Bilal aliyasema hayo juzi kwenye mkesha maalumu wa kuliombea Taifa amani na kukaribisha mwaka mpya wa 2015 katika Uwanja wa Taifa, Dar es Salaam.

Alisema mwaka 2015 Taifa litafanya Uchaguzi Mkuu hivyo ni vyema Watanzania wakatumia fursa hiyo kuchagua viongozi ambao wataendeleza amani na utulivu wa nchi.

“Ndugu zangu Watanzania, taifa letu limekuwa na amani, utulivu kwa kipindi kirefu tangu uhuru hivyo tusikubali kikundi cha watu wenye uchu wa madaraka waivuruge amani yetu.

“Serikali itaendelea kuilinda amani tuliyonayo kwa gharama yoyote ili Watanzania waendelee kuishi kwa amani katika nchi yao... nawaomba mshiriki kikamilifu katika mchakato wa kupata Katiba mpya Aprili 30, mwaka huu kwa kuipigia kura ya ndiyo Katiba Inayopendekezwa,” alisema.

Baadhi ya viongozi walioshiriki katika tamasha hilo ni pamoja na Waziri wa Uchukuzi, Dkt. Harrison Mwakyembe, Mkuu wa Mkoa wa Dar es Salaam, Bw. Said Mecky Sadiki, Mkuu wa Wilaya ya Temeke, Bi. Sophia Mjema na wengine.

Wakati huo huo, Askofu wa Kanisa Katoliki Jimbo la Bukoba, mkoani Kagera, Mhashamu Deusderius Rwoma, ameitaka Serikali isambaze Rasimu ya Katiba Inayopendekezwa kwa wananchi ili waisome na kuielewa kabla ya kuipigia kura.

Alisema katiba hiyo ikisambazwa, wananchi wanapaswa kuisoma na kuielewa pamoja na kuwataka waumini wa kanisa hilo, kuliombea Taifa ili mchakato huo uweze kukamilika salama kwa amani na utulivu.

Askofu Rwoma alisema hayo juzi kwenye misa ya mkesha wa mwaka mpya iliyofanyika Kanisa Kuu, Jimbo la Bukoba.

“Waumini mnapaswa kumshukuru Mungu kwa mazuri yote aliyowafanyia mwaka 2014... kuna watu ambao walitamani kuuona mwaka 2015 lakini hawakuweza,” alisema.

Aliwaomba waumini kuyaombea makundi maalumu ya watu wenye shida na kuwatembelea wakiwemo yatima, wagonjwa na wafungwa ili kuwafariji.

Wakati huo huo, Watanzania wote wameshauriwa kufanyakazi kwa bidii mwaka 2015, kuungama na kumrudia Mungu.

Msaidizi wa Askofu wa Kanisa la Kiinjili la Kilutheri Tanzania (KKKT), Dayosisi ya Kaskazini Magharibi, Mchungaji Remy Rwankomezi, aliyasema hayo juzi katika ibada ya mkesha wa mwaka mpya katika Kanisa la Kengele Tatu, Bukoba.

Chanzo:Majira

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.