MIGOGORO INAVYOZOELEKA VYUONI

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

 

Tabia ya wanafunzi wa elimu ya juu kugoma ili kushinikiza Serikali au uongozi wa chuo husika kufanya jambo fulani imeanza kuzoeleka nchini.

Migomo hiyo huambatana na vurugu zinazosababishwa aidha na wanafunzi kuamua kufanya fujo au askari polisi wakati wakiwatawanya wanafunzi waliogoma.

Chuo Kikuu cha Kimataifa cha Kampala (Kiu) kilichopo Dar es Salaam ni taasisi ya elimu ya juu ambacho hakiwezi kuwekwa kando kati ya vyuo vinavyokumbwa na migogoro.

Chuo hicho kimetawaliwa na migomo ya wanafunzi wake kutokana na changamoto mbalimbali zinazoibuliwa na wanafunzi wake.

Vuguvugu la mgomo katika chuo hicho lilianza Januari, 2011 baada ya kuwepo kwa taarifa kwamba kilikuwa hakijasajiliwa nchini, bali kilikuwa kikiendesha shughuli zake kinyume na sheria inayotaka taasisi yoyote ya elimu ya juu kusajiliwa.

Wanafunzi walilalamika kukosa mikopo inayotolewa na Bodi ya Mikopo ya wanafunzi wa Elimu ya Juu (HESLB), kwa sababu HESLB haikukitambua chuo hicho.

Tatizo hilo liliendelea, licha ya uongozi wa chuo hicho kuwaambia wanafunzi kwamba kilikuwa kimesajiliwa.

Baadaye uliibuka mzozo mwingine juu ya ulipaji wa ada. Wanafunzi walikuwa wakilipa ada zao kwa Dola ya Marekani. Walikataa kuendelea kulipa kwa fedha hiyo baada ya kubaini kwamba wanalipa zaidi, ikilinganishwa na vyuo vingine.

Serikali ilitoa agizo kwa chuo hicho kusitisha ulipaji wa ada kwa Dola kwa wanafunzi wa Kitanzania. Hata hivyo wanafunzi kutoka nchi nyingine wanaendelea kulipa kwa Dola.

Matatizo mengine

Wanafunzi wa Kiu wamebainisha matatizo yanayokikabili chuo hicho. Baadhi ya matatizo hayo ni ufundishaji wa Kozi ya Multi-Purpose Program(MPP), ambayo hutolewa kwa wanafunzi kabla (MPP) hawajaanza rasmi kusoma shahada zao.

Mwanafunzi wa mwaka wa kwanza, Shahada ya Famasia, Ally Mustapha Said anasema kuwa wanapewa masomo mengi ya kusoma tena kwa ada kubwa na muda mrefu kuliko inavyotakiwa.

Saidi anataja masomo 10 wanayofundishwa kuwa ni Kiingereza, kompyuta, elimu ya viumbe (biolojia), kemia, hesabu, fizikia, maadili, sayansi ya tabia (behavioral science), stadi za mawasiliano na ujasiriamali.

“Jambo la kushangaza, masomo yote haya tunafundishwa kwa muhula mzima, badala ya siku 72. Pia, tunaambiwa tulipie ada kama tunayolipa kwenye masomo ya shahada. Serikali haijasema chochote mpaka sasa, tunaendelea kulipa fedha nyingi,” analalamika Said.

“Mwanafunzi huyo anasema kuwa ikiwa mtu amefeli masomo ya msingi (elimu ya viumbe, kemia na fizikia), atalazimika kurudia kozi nzima ya MPP, badala ya masomo aliyofeli,” anasema akiongeza kuwa, mwanafunzi analazimika kulipa ada nyingine kwa ajili ya kozi hiyo.

Said anabainisha kuwa Bodi ya Mikopo, haitoi fedha kwa ajili ya mahitaji ya kozi maalumu (special falcuty). Anasema kuwa wanatumia pia fedha zao kwa ajili ya kununua machapisho yanayotolewa na walimu wao.

“Mwalimu anaandaa kitini cha mazoezi, anatuambia tununue kwa Sh80,000. Hebu fikiria, tuna kozi 10, kila somo ulipie kiasi hicho cha fedha, jumla ni shilingi ngapi? Mzazi anatoa wapi pesa ya kulipa ada na mambo mengine ya darasani?” anahoji mwanafunzi huyo.

Usajili wa chuo na kozi za afya

Rais wa Kitivo cha Sayansi ya Tiba chuoni hapo, Jackson Raymond anasema wamebaini kuwa hamna kozi yoyote ya afya iliyosajiliwa na Baraza la Famasia nchini huku wenzao waliomaliza mafunzo yao chuoni hapo wakinyimwa leseni za ufamasia kwa sababu chuo hicho hakijapata usajili wa kozi zake.

“Juni mosi, tulimsikia Mwenyekiti wa Kamati ya Bunge ya Huduma za Jamii, Magreth Sitta akisema chuo chetu bado kina usajili wa muda mfupi. Tunashangaa ugumu uliopo kwa chuo chetu kupatiwa usajili wa kudumu,” anasema mwanafunzi huyo.

Anadai kuwa chuo chao pia kinatumia mtalaa wa nje, kinyume cha Sheria ya TCU, inayotaka chuo chochote kufundisha kwa kufuata mtalaa wa ndani baada ya kuhakikiwa na tume hiyo au mamlaka nyingine za afya.

“Sisi tupo hapa kimwili tu, lakini kiakili tuko Uganda kwa sababu tunachofundishwa hapa ni mtalaa wa Uganda. Tunaomba Serikali ituhamishie kwenda vyuo vya ndani, vinavyotoa shahada za afya,” anafafanua Raymond.

Anasema wamefuatilia sehemu mbalimbali kujua hatima yao, lakini hakuna mafanikio yoyote. Wamekwenda TCU, kwa Mkuu wa Wilaya ya Ilala, Wizara ya Eimu hata Wizara ya Afya, lakini matatizo yao bado hayajapatiwa ufumbuzi.

“Hofu yetu kubwa ni hatima yetu baada ya kumaliza masomo. Tunaweza kuwa hapa baadaye tukaambiwa hatuwezi kupata ajira kwa sababu tunachokisoma hakijasajiliwa. Sasa tunataka kauli ya Serikali, isije tukawa tunapoteza muda na fedha zetu nyingi bila sababu ya msingi,” anasema kiongozi huyo wa wanafunzi na akitaka kujua suluhisho kwa wanafunzi waliomaliza chuoni hapo.

Gabriel Biseko anasema chuo hicho kimekuwa kikiwataka wanafunzi wanaofeli mtihani kulipa Sh40,000 kwa ajili ya kurudia mtihani huo wa ‘supplementary’.

Anasema kuwa jambo hilo limekuwa likiwaumiza kwa sababu ya kipato kidogo cha wazazi wao.

“Sijawahi kuona chuo chochote kinalipisha wanafunzi wake mtihani wa supplementary, ni hapa tu. Serikali imekiacha chuo hiki kijiendeshe kinavyotaka, sijui TCU wanafanya kazi gani, kama wanashindwa kusimamia uendeshaji wa chuo hiki,” anafafanua mwanafunzi huyo.

Biseko anaendelea kusema chuo hicho pia kinatoa kozi maalumu (bridging course) kwa ajili ya wanafunzi ambao hawakufanya vizuri katika mitihani yao sekondari. Anaeleza ya kuwa jambo la kushangaza ni kwamba, hata wanafunzi ambao hawakusoma masomo ya sayansi wamekuwa wakifundishwa kozi hiyo ya muda mfupi, kisha wanajiunga na chuo hicho.

Kauli ya KIU

Uongozi wa chuo hicho ulipofuatwa ili kutoa kauli kuhusu madai hayo, ulieleza kuwa haupo tayari kufanya hivyo kwa sasa.

Kauli ya Serikali

Hata hivyo, malalamiko hayo ya wanafunzi, yanahitimishwa na Serikali baada ya kutembelea KIU, kuzungumza na uongozi na kutoka kauli.

Juni 10, mwaka huu, Waziri wa Elimu na Mafunzo ya Ufundi, Dk Shukuru Kawambwa alitembelea chuo cha Kampala ili kuzungumza na uongozi wa chuo hicho pamoja na uongozi wa wanafunzi.

Wanafunzi wa Kitivo cha Sayansi ya Tiba wa chuo hicho walifika chuoni hapo ili kutaka kuzungumza na waziri huyo licha ya kuwa walisimamishwa masomo, pia kupigwa mabomu na polisi siku moja kabla ya ujio wa waziri.

Baada ya mazungumzo na uongozi wa chuo, Dk Kawambwa alizungumza na wanafunzi hao na kusikiliza madai yao, hoja kubwa ikiwa usajili wa chuo na kozi za famasia. Hata hivyo, Dk Kawambwa aliwaondoa hofu wanafunzi na kuwathibitishia kuwa chuo chao kimesajiliwa kama chuo cha nje sawa na ilivyo kwa vyuo vingine vya aina hiyo.

Alisisitiza kuwa kozi zinazofundishwa katika chuo hicho, ndizo hizo zinazotolewa pia kwenye matawi mengine ya chuo hicho yaliyopo nje ya nchi. Alisema kozi hizo zimepitiwa na TCU na kuidhinishwa kwa sababu zinakidhi matakwa ya mitalaa ya Tanzania.

“Nchi za Afrika Mashariki zimekubaliana kwamba kama programu zimepitishwa Kenya au Uganda, basi nchi zote za Afrika Mashariki zitazitambua. Lengo ni kufanya cheti cha mwanafunzi kutambulika pia maeneo mengine,” alisema waziri huyo.

Dk Kawambwa aliongeza kuwa Chuo Kikuu Huria cha Tanzania (OUT), kimeanzisha pia matawi katika nchi za Rwanda, Kenya na Uganda na mtalaa wa Tanzania ndiyo unaofundishwa katika nchi hizo.

Hata hivyo, waziri huyo alisema KIU kimeanza utaratibu wa kuwa chuo cha ndani na kwamba taratibu zinaendelea na kitafundisha programu za ndani kama ilivyo kwa vyuo vingine vya ndani.

Kuhusu usajili wa kozi za famasia, Waziri Dk Kawambwa alitoa barua ya TCU kwenda KIU, kuthibitisha kuwa kozi zote za famasia zilikuwa zimethibitishwa na TCU tangu Januari 3, 2012.

Kauli ya Nacte

Mkurugenzi Mtendaji wa Baraza la Elimu ya Ufundi (Nacte), Dk Primus Nkwera alifafanua kuhusu kozi za muda mfupi na kusema kuwa kozi hizo ni halali kufundishwa katika chuo chochote kwa sababu zinamwandaa mwanafunzi kumudu masomo yake.

Hata hivyo, anatahadharisha kuwa kama mwanafunzi hakusoma masomo ya sayansi O-Level, kozi hiyo haiwezi kumsaidia kwa sababu inafundishwa kwa muda mfupi kwa aliye na misingi

Chanzo:Mwananchi