CHEKA KUZIPIGA UJERUMANI NOV. 17

na Elizabeth John

BONDIA mahiri wa ngumi za kulipwa nchini, Francis Cheka ‘SMG’, jana amesaini mkataba wa pambano la kuwania ubingwa wa mabara unaotambuliwa na IBF, dhidi ya Bernard Simon, ambalo linatarajiwa kufanyika jijini Berlin, Ujerumani Novemba 17 mwaka huu.

Akizungumza na waandishi wa habari jijini Dar es Salaam jana, wakati wa kusaini mkataba huo, Meneja wa Cheka, Juma Mabakila, alisema pambano hilo ni la kufuzu kuingia kwenye ‘chati’ ya mabondia 15 ambao wataiwakilisha dunia.

Cheka ameingia mkataba na kampuni za Jambo Concepts, International Boxing Federation (IBF), Tanzanite Sports Promotions Management, Kitwe General Traders na Louaa Boxing Promotions ya Misri, ambayo watashirikiana kwa mwaka mmoja kumtafutia pambano kila baada ya mwezi mmoja.

Naye Rais wa Oganaizesheni ya Ngumi za Kulipwa Tanzania (TBPO), Onesmo Ngowi, alisema baada ya pambano hilo, Cheka atapanda tena ulingoni Novemba 27 kupambana na bondia Amin Said wa Uarabuni katika pambano lisilo na ubingwa.

“Cheka ni bondia ambaye Watanzania wengi tunamtegemea na tunajua kabisa kama ni bingwa wa Afrika, hivyo naamini hawezi kutuangusha katika hilo, Watanzania tunatakiwa kumuombea,” alisema Ngowi.

Kwa upande wake, Cheka alisema, yeye siku zote huwa si muongeaji, bali mikono ndiyo inazungumza na anaamini ataiwakilisha vizuri Tanzania na Watanzania wategemee vitu vizuri kutoka kwake.

Chanzo: Tanzania Daima