NYALANDU: NGUVU YA UJANGILI IMEONGEZEKA

na Asha Bani

NAIBU Waziri wa Maliasili na Utalii, Lazaro Nyalandu, amesema hali ya ujangili kwa sasa ni mbaya nchini na kwamba kunahitaji nguvu za ziada kupambana nao.

Akizungumza na waandishi wa habari jijini Dar es Salaam jana kuhusu kukamilika kwa maandalizi ya kongamano la kwanza la Afrika litakalofanyika Oktoba 15 hadi 18, alisema pia ujangili upo hata katika nchi za Afrika Mashariki ambazo zimeizunguka Tanzania.

Alisema hali hiyo imechangiwa na nchi za Japan, Marekani, Taiwan kutokana na kuwapo kwa uhitaji mkubwa wa rasilimali zitokanazo na wanyama.

Hata hivyo, alisema serikali itaongeza nguvu katika kuhakikisha kuna ulinzi wa kutosha katika mbuga sambamba na silaha pamoja na askari.

Akizungumzia maandalizi ya kongamano hilo lililoandaliwa na Shirikia la Umoja wa Mataifa la Utalii Duniani (UNWTO) ambapo Tanzania wamechaguliwa kuwa wenyeji, alisema yamefikia hatua ya mwisho na mgeni rasmi anatarajiwa kuwa Makamu wa Rais, Mohamed Ghalib Bilal .

Alisema katika mkutano huo watu 412 kutoka katika nchi 40 za Afrika wamejisajili kushiriki.

Chanzo: Tanzania Daima