MKAKATI WA KUBAINI SIMU BANDIA WAIVA

Oliver Oswald na Ivilla Mgala, Dar es Salaam

CHAMA cha Wafanyabiashara wa simu nchini kimeandaa mkakati maalum kwa ajili ya kutokomeza simu bandia zinazouzwa na baadhi ya wafanyabiashara wajanja nchini.

Akizungumza Dar es Salaam jana na MTANZANIA, Katibu wa wafanyabiashara hao, Sued Chemchem, alisema kutokana na kuenea kwa simu bandia, kumesababisha soko la bidhaa hizo kukosa wateja wa uhakika.

Alisema wafanyabiashara wajanja kwa kiasi kikubwa wamechangia kudidimiza soko la ndani kutokana na wateja wengi kukosa imani na simu hizo.

“Sisi kama wafanyabiashara tunawaomba hao wanaofanya mchezo huo kuacha kwani wanaturudisha nyuma kimaendeleo na kutukosesha wateja,” alisema Chemchem.

Alisema kutokana na kukithiri kwa uuzaji wa simu bandia, wameiomba mamlaka inayohusika kuhakikisha inatokomeza simu hizo madukani, ikiwa ni pamoja na kuwachukulia hatua kali wanaojihusisha na vitendo hivi.

“Hali hii imekuwa ikituumiza sisi kama wafanyabiashara, kwani wengine wanabuni mbinu za kutengeneza simu za bandia, hivyo sisi tukiagiza mzigo na kuleta nchini unatoka kwa kusuasua kwa kuwa wajanja wanaouza simu za bandia wanauza kwa bei ndogo,” alisema Chemchem.

Chemchem alisema chama chao kimelenga kuwakomboa wafanyabiashara wadogo wasio na mitaji kwa kuwawezesha kufikia malengo ya kibiashara, ikiwa ni pamoja na kuwapa mbinu bora za kujikomboa kiuchumi.

Chanzo: Tanzania Daima