Wabunge ‘wang’ang’ania’ chenji ya rada

Wabunge wengi wamedaiwa kutamani kunufaisha majimbo yao fedha zilizotokana na chenji ya rada, hivyo ni changamoto kwa wizara zilizokabidhiwa kusimamia matumizi yake.

Madai hayo yaliwasilishwa na Katibu Mkuu wa Ofisi ya Waziri Mkuu, Tawala za Mikoa na Serikali za Mitaa (Tamisemi), Jumanne Sagini kwenye ripoti ya matumizi ya chenji hiyo kwa Kamati ya Bunge ya Hesabu za Serikali.

“Ni changamoto kubwa hasa ugawaji wa madawati, tulikubaliana tupeleke kwenye wilaya tisa ikiwamo za Mkoa wa Dar es Salaam, lakini tulishambuliwa na wabunge hadi tulijikunyata,” alisema Sagini.

Alisisitiza kuwa kuna wabunge wengine walidai kwamba, hawapo tayari kukosa madawati maeneo yao kwa sababu ndiyo walifuata chenji hiyo.

Akizungumzia suala hilo, Mwenyekiti wa Kamati ya Hesabu za Serikali, Kabwe Zitto alisema iwapo watafuata matakwa hayo itakuwa ni vigumu kuyatekeleza kutokana na mahitaji makubwa ya madawati yaliyopo kwenye shule nyingi zilizopo nchini.

Pia, Mbunge wa Tabora Mjini, Aden Rage kwa upande wake alishauri Tamisemi kugawa fedha zilizopangwa kugharimia madawati kwa halmashauri, ili kuwezesha utengenezaji wa madawati mengi kwa bei nafuu katika maeneo ambayo mbao zinapatikana.

Katika majibu yake, Sagini alikataa ushauri huo akieleza kwamba madawati mengi ambayo yamewahi kutengenezwa chini ya usimamizi wa halmashauri yana kiwango kisichoridhisha.

“Fedha hizi tunatakiwa kuzitumia kwa vitu vyenye kiwango,” alisema.
Chanzo;Mwananchi