Washtakiwa wahoji lilipo jalada lao

Mshtakiwa Makongoro Joseph Nyerere anayekabiliwa na kesi ya mauaji ya kukusudia ya mfanyabiashara wa madini, Onesphory Kituli, ameutaka  upande wa mashtaka kuwa wazi kuhusu upelelezi wa kesi yao na iwapo jalada lao kama lipo kwa DPP ama kwa RCO.

Mbali na Makongoro mwingine anayekabiliwa na kesi hiyo ya mauaji ya kukusudia ni mfanyabiashara maarufu wa Dar es Salaam, Abubakar Marijan (50) maarufu kwa jina la Papaa Msofe.

Makongoro alitoa malalamiko hayo jana mbele ya Hakimu Mkazi, Hellen Liwa  baada ya Wakili wa Serikali,Leonard Challo kudai upelelezi wa kesi bado haujakamilika.

Baada ya Wakili Challo kutoa maelezo hayo, Makongoro aliiambia mahakama kuwa wanataka kufahamu upelelezi wa kesi yao umefikia wapi na kuhoji kuwa, awali upande wa mashtaka ulisema jalada hilo la kesi yao tayari lipo kwa DPP na jana kwa RCO.

Alihoji ni kwa nini upande wa mashtaka hawataki kuwa wakweli kuhusu kesi yao. Hakimu Liwa alimwambia kuwa sawa wamemsikia na kuahirisha kesi hadi Februari 18, 2014 kwa ajili ya kutajwa na kuamuru washtakiwa kupelekwa rumande kwa sababu shtaka lao halina dhamana.

Papa Msofe alipandishwa kizimbani kwa mara ya kwanza peke yake Agosti, 2012 na kusomewa shtaka la kumuua Kituli kwa makusudi, kinyume cha kifungu cha 196 cha Kanuni za Adhabu sura ya 19 kama kilivyorekebishwa mwaka 2002.

Makongoro aliunganishwa na Papa Msofe katika kesi hiyo, Februari 13,2013. Washtakiwa hao kwa pamoja wanadaiwa kulitenda kosa hilo,Oktoba 11, 2011 nyumbani kwake, Magomeni Mapipa.
Chanzo;Mwananchi