VIONGOZI WA DINI, SERIKALI WAJADILI TISHIO LA UJANGILI

 

Waziri wa Maliasili na Utalii, Lazaro Nyarandu, amesema serikali itaendelea kuboresha uhusiano wake na viongozi wa dini katika kupambana na wimbi la vitendo vya ujangili nchini.

 

Akizungumza katika mkutano na viongozi hao jijini Dar es Salaam jana, Nyarandu alisema ongezeko hilo limesababisha madhara makubwa kwa serikali kupoteza rasilimali za wanyama ambayo ni tegemeo kwa mapato.

 

Alisema kundi la majangili limeingia katika mbuga mbalimbali za wanyama kama Tarangire, Manyara, Mikumi, Ngorongoro na kusababisha idadi kubwa ya wanyama kuuliwa bila sababu.

 

Alisema viongozi hao wana nafasi kubwa ya kufichua kundi hilo la majangili kupitia nyumba za ibada yakiwamo na maeneo mengine ya shughuli za kijamii.

 

Kadhalika, aliwataka viongozi hao kuweka agano la pamoja katika kutatua changamoto hiyo hasa kwa kukubaliana ni jinsi gani ya kuzilinda rasiliamali hizo.

 

“Tunachofanya ni kuweka mpango madhubuti endelevu ila jukumu kubwa litakuwa kwa viongozi wa dini, kwa sababu wao wanakutana na watu wengi kwa nyanja mbalimbali tofauti na serikali,” alisema Nyarandu.

 

Alisema ili kukabiliana na ongezeko hilo, wizara yake imeongeza kikosi cha askari wa wanyamapori kitakachodhibiti majangili mara na baada ya kufanya uhalifu.

 

Pia, aliwashauri waweke mfumo endelevu kwa kushirikiana na serikali kwa pamoja kuangalia namna ya kukabiliana na changamoto hiyo, ingawa ni kubwa kuliko serikali inavyodhani.

 

Askofu wa Kanisa la Anglikana Dayosisi ya  Dar es Salaam, Valentino Mokiwa, alisema kutokana na mtandao wa ujangili kukua kwa kasi nchini, huku ukiongoza kuwa mstari wa mbele kuchangia nyumba za ibada, ni jukumu la viongozi kuwa makini na jambo hilo maana ni dhambi mbele za Mungu.

 

“Nafikiri katika hili hata sisi viongozi wa dini tunahusika kushtakiwa mbele za Mungu, kwa sababu tumekuwa tukiwapa kipaumbele katika nyumba za ibada kwa kisingizio cha kutoangalia matendo yake bali michango yao,” alisema Askofu Mokiwa.

 

Aliishairi serikali kutoa adhabu kwa majangili inayofanana na ile ya mauaji mengine kwani kitendo hicho ni ishara mbaya mbele za Mungu.

 

“Kumuua mnyama ni dhambi kama dhambi nyingine, hivyo tunapendekeza adhabu zao ziangaliwe kuanzia shina, kiungo na msambazaji,” alisema.

 

Naye Sheikh wa Mkoa wa Dar es Salaam, Alhad Mussa Salum, aliwataka Watanzania kuwathamini wanyama kama viumbe vingine vilivyoumbwa na Mungu.

 

Alisema Watanzania wengi wamekuwa wakipotoshwa na waganga wa kienyeji kwa kuwatumia wanyama pori hasa kwa vitendo vya  kikatili  kama sehemu ya kafara  kwa mihadi mbalimbali ya maradaka na kwamba usafirishaji wake hadi uuaji wake ni wa kikatili.

 

“Mungu ameruhusu mnyama auliwe kwa sababu maalum, hivyo kuwatumia au kuwaua wanyama kinyume cha maandiko ya Mungu ni dhambi,” alisema Sheikh_ Salum.

 

CHANZO: NIPASHE

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.