Dar es salaam Yetu

MENEJA NSSF KINONDONI AWATAKA WAJASIRIAMALI KUENDELEA KUJIUNGA NA KUJIWEKEA AKIBA ILI WAWEZE KUNUFAIKA NA MAFAO

Meneja wa NSSF Mkoa wa Kinondoni, Bw. Large Materu ametoa wito kwa wajasiriamali kuendelea kujiunga na kujiwekea akiba katika Mfuko ili waweze kunufaika na mafao yanayotolewa yakiwemo ya uzee, uzazi na matibabu.

Alitoa wito huo wakati akiongoza utoaji wa elimu ya hifadhi ya jamii kwa viongozi wa masoko na baadaye wafanyakazi wa NSSF waliweka kambi kwenye masoko ya Kawe na Tegeta Nyuki kwa ajili ya kutoa elimu ya hifadhi ya jamii, kuandikisha wanachama wapya, kuhamasisha uchangiaji ambapo hamasa ya wajasiriamali kupata elimu na kujiunga imekuwa kubwa.

“Napenda kutoa wito kwa wajasiriamali wote wakiwemo mama lishe, bodaboda, wakulima, wafugaji, wavuvi kuwa NSSF ndio Mfuko wao, hivyo waendelee kujiunga na kujiwekea akiba ili waweze kunufaika na mafao yote kama vile ya uzee, urithi, uzazi na matibabu,” alisema.

Bw. Materu alisema NSSF imeweka utaratibu mzuri wa wajasiriamali kujiunga na kuchangia ambapo mwanachama baada ya kujiandikisha anapewa namba ya kumbukumbu ya malipo na anapaswa kuchangia kuanzia shilingi 30,000 au 52,200 au zaidi kwa mwezi na anaweza kuchangia kidogo kidogo kwa siku, wiki au mwezi ili aweze kunufaika na mafao hayo.

Aidha, alisema NSSF imepiga hatua kubwa katika utoaji wa huduma kwa wanachama na wananchi kwa kutumia mifumo ya TEHAMA ambayo inarahisisha huduma. "Tunaishukuru Menejimenti ya NSSF kwa kuweka nguvu kubwa sana katika kubadilisha mwelekeo wa utendaji kazi kuwa wa kidijitali zaidi ambapo imepelekea wanachama na wananchi kwa ujumla kupata huduma hukohuko waliko bila ya kulazimika kufika katika ofisi za NSSF," alisema Bw. Materu.

Alisema hayo ni mafanikio makubwa na kuwa lengo la NSSF ni kuendelea kufanya maboresho zaidi ya mifumo ili kumuwezesha mwanachama aweze kufungua madai ya mafao yake kwa njia ya mtandao bila ya kulazimika kufika kwenye ofisi za Mfuko.

WAJASIRIAMALI SOKO LA TEGETA NYUKI WANUFAIKA NA ELIMU YA HIFADHI YA JAMII KUTOKA NSSF

Na MWANDISHI WETU,

Dar es Saalam. Lengo la Mfuko wa Taifa wa Hifadhi ya Jamii (NSSF) kufikisha elimu ya hifadhi ya jamii kwa makundi mbalimbali ya wananchi linaendelea kwa kasi baada ya wajasiriamali katika soko ya Tegeta Nyuki, jijini Dar es Salaam, kuhamasika kujiwekea akiba baada ya kupata elimu kutoka NSSF ili waweze kunufaika na mafao.

NSSF kupitia kwa Meneja wa Sekta isiyo rasmi, Bi. Rehema Chuma imeweka kambi ya siku nne katika soko la Tegeta Nyuki na Kawe, lengo likiwa ni kutoa elimu ya hifadhi ya jamii, kuandikisha wanachama wapya na kuhamasisha uchangiaji ambapo hamasa ya wajasiriamali kupata elimu na kujiunga imekuwa kubwa.

Akizungumza tarehe 8 Januari 2025, Bi. Rehema amesema katika muendelezo wa utoaji elimu kwa wajasiriamali NSSF imefika katika soko la Tegeta Nyuki kwa ajili ya kufikisha elimu kuhusu umuhimu wa wananchi kujiunga na kujiwekea akiba kwa maisha yao ya sasa na ya baadaye.

Amesema kuna namna mbili za mwanachama kujiunga moja wapo ni kujaza fomu na mwenye namba ya NIDA anaelimishwa kujisajili kwa kutumia mifumo, na kuwa mwanachama anaweza kuwasilisha michango kupitia simu ya kiganjani huko huko aliko ambapo kima cha chini cha kuchangia ni shilingi 30,000 ambapo atanufaika na fao la matibabu.

Baadhi ya wajasiriamali akiwemo Pastory Anthony ambaye ni mwanachama wa NSSF ananufaika na mafao yanayotolewa na Mfuko ikiwemo ya matibabu pamoja na familia yake.

Amesema kuna faida nyingi ambazo anazipata kwa kuwa mwanachama wa NSSF hivyo amewaomba wajasiriamali wengine kujiwekea akiba NSSF kwani ni mkombozi kwa kila mwanachama.

Naye, Bw. Marc Donald Maganga, Afisa Mkuu wa Sekta isiyo rasmi, amesema NSSF imeweka utaratibu nzuri wa wajasiriamali kujiunga na kuchangia ambapo mwanachama baada ya kujiandikisha anapewa namba ya kumbukumbu ya malipo na anapaswa kuchangia kuanzia shilingi 30,000 au 52,200 au zaidi kwa mwezi na anaweza kuchangia kidogo kidogo kwa siku, wiki, mwezi, muhula au msimu ili aweze kunufaika na mafao yote yanayotolewa ikiwemo ya uzee, urithi, uzazi, matibabu na msaada wa mazishi.

TANZANIA NA UINGEREZA KUSHIRIKIANA KATIKA KUENDELEZA MADINI MKAKATI

▪️Waziri Mavunde ainisha Mkakati wa uongezaji thamani Madini

▪️Taasisi za Jiolojia na Utafiti Madini za Tanzania na Uingereza kushirikiana

▪️Watanzania kujengewa uwezo kukuza ujuzi

📍Dar es Salaam

Serikali ya Tanzania imeihakikishia Serikali ya Uingereza kuendeleza ushirikiano kwenye sekta ya madini hususani katika kujengea uwezo watu wake, kubadilishana uzoefu, uongezaji thamani madini na kuwekeza kwenye kufanya tafiti mbalimbali ili kukuza sekta ya madini na kupanua mnyororo wa thamani ili kuongeza ajira na kuchangia katika ukuaji wa pato la taifa.

Hayo, yameelezwa Jana na Waziri wa Madini, Mh. Anthony Mavunde katika ofisi ndogo za Wizara ya Madini jijini Dar es Salaam alipokutana na kufanya mazungumzo na Balozi wa Uingereza nchini Tanzania, Mhe. Marianne Young.

"Kwanza kabisa Mhe. Balozi Young amefika ofisini kujitambulisha kwakuwa ana muda mfupi nchini tangu awasili lakini pia tumezungumzia ushirikiano mkubwa uliopo kati ya Tanzania na Uingereza.

Katika mazungumzo hayo, Tanzania na Uingereza zimekubaliana katika kuwajengea uwezo watu wake na kubadilishana uzoefu hususani katika Taasisi ya Jiolojia na Utafiti wa Madini nchini (GST) na British Geological Survey (*BGS*)ya Uingereza ili kuwajengwa uwezo Watanzania kwakuwa na ujuzi stahiki katika masuala ya uendelezaji wa sekta ya madini

Eneo la pili tulilozungumzia kwa urefu ni katika madini mkakati ambapo Uingereza wameonesha utayari katika kushirikiana na Tanzania katika eneo la mnyororo mzima wa uongezaji thamani madini mkakati ambapo Tanzania imejipanga kuhakikisha inavutiwa uwekezaji mkubwa wa ujenzi wa viwanda vya kuongeza thamani madini hapa nchini.

Sasa ni muda muafaka wa kuhakikisha madini ya kimkakati yanawanufaisha Watanzania na taifa, na ndiyo maana tumeandaa Mkakati maalumu wa kutekeleza azma hiyo huku ikizingatiwa kuwa madini hayo kwa sasa yana mahitaji makubwa duniani.

Tupo katika hatua za mwisho kukamilisha mkakati huu maalum wa madini mkakati na muhimu ambao pia ni sehemu ya Kampeni ya Dunia katika kupunguza hewa ya ukaa kupitia matumizi ya nishati safi," amesema Waziri Mavunde.

Akizungumza katika Mkutano huo Balozi wa Uingereza nchini Tanzania Mh. Marriane Young amesema Uingereza inapongeza jitihada kubwa za kukuza sekta ya madini zinazofanywa na serikali ya Tanzania chini ya Uongozi wa Mh. Rais Dkt. Samia S. Hassan na kuahidi kuimarisha ushirikiano mkubwa baina ya nchi hizi hasa katika kubadilishana uzoefu na kujengeana uwezo kupitia Taasisi za madini nchini Uingereza na Tanzania.

Balozi Young ameunga mkono mpango wa uongezaji thamani madini nchini na kuahidi kwamba Uingereza itashirikiana na Tanzania kwa ukaribu ili malengo hayo yatimie.

UCHUMI WA TANZANIA UNATARAJIWA KUKUA KWA ASILIMIA 5.7 KATIKA ROBO YA NNE YA MWAKA 2024

NA EMMANUEL MBATILO, MICHUZI TV

UCHUMI wa Tanzania Bara na Zanzibar umeendelea kuwa imara kwa mwaka 2024 ambapo Uchumi wa Tanzania Bara ulikua kwa asilimia 5.4 katika nusu ya kwanza ya mwaka 2024, na unatarajiwa kukua kwa asilimia 5.6 katika robo ya tatu na asilimia 5.7 katika robo ya nne ya mwaka 2024.

Kwa kuzingatia mwenendo huo, ukuaji wa uchumi unatarajiwa kuwa sawia na matokeo ya ukuaji wa asilimia 5.4 kwa mwaka 2024.

Hayo yameelezwa leo Januari 8, 2025 na Gavana wa Benki Kuu ya Tanzania, Emmanuel Tutuba wakati akizungumza na waandishi wa habari mara baada ya kikao cha robo mwaka cha Kamati ya Sera ya Fedha ya Benki Kuu ya Tanzania kufanyika na kufanya tathmini ya mwenendo wa hali ya uchumi wa dunia na hapa nchini.

Amesema ukuaji huu umechangiwa zaidi na ongezeko la shughuli za kilimo, usafirishaji, ujenzi, na biashara ambapo kwa upande wa Zanzibar, uchumi ulikua kwa asilimia 6.8 katika robo ya kwanza na asilimia 7.2 katika robo ya pili ya mwaka 2024, na unakadiriwa kukua kwa viwango hivyo kwa robo mbili zinazofuata, hivyo kufikia maoteo ya ukuaji wa asilimia 7.2 kwa mwaka 2024.

Aidha Tutuba amesema katika mwaka 2025, ukuaji wa uchumi kwa Tanzania Bara na Zanzibar unatarajiwa kuendelea kuwa wa kasi ya kuridhisha, kwa takriban asilimia 6 na asilimia 6.8, mtawalia.

"Ukuaji huu unatarajiwa kuchangiwa na ongezeko la uzalishaji katika shughuli za kilimo, utekelezaji wa miradi ya ujenzi, maboresho katika usafirishaji na ugavi, nishati ya uhakika, pamoja na utekelezaji wa sera za fedha na kibajeti". Amesema

Amesema mfumuko wa bei uliendelea kuwa tulivu katika kipindi chote cha mwaka 2024, ukiwa chini ya lengo la asilimia 5 kwa Tanzania Bara na kukaribia lengo hilo kwa upande wa Zanzibar.

Tutuba amesema katika robo ya nne ya mwaka 2024, mfumuko wa bei kwa Tanzania Bara ulikuwa wastani wa asilimia 3 kutokana na upatikanaji wa chakula cha kutosha, utekelezaji wa sera thabiti za fedha na bajeti, na kupungua kwa bei za bidhaa katika soko la dunia, hususan mafuta ghafi.

Vilevile amesema kwa upande wa Zanzibar, mfumuko wa bei ulipungua hadi asilimia 4.5 mwezi Novemba 2024.

"Mfumuko wa bei unatarajiwa kuendelea kuwa tulivu katika robo ya kwanza ya mwaka 2025, ukibakia katika viwango vya kati ya asilimia 3.1 na asilimia 4. Hali hii itatokana na kuendelea kuwepo kwa chakula cha kutosha, utulivu wa thamani ya shilingi dhidi ya fedha za kigeni, umeme wa uhakika, na kushuka kwa bei za bidhaa katika soko la dunia, hususan mafuta ghafi.

Pamoja na hayo Gavana Tutuba amesema thamani ya shilingi inatarajiwa kuwa imara katika robo ya kwanza ya mwaka 2025, kutokana na kuwepo kwa ukwasi wa kutosha wa fedha za kigeni uliopatikana katika robo ya nne ya mwaka 2024, utekelezaji wa sera ya fedha kutokana, uamuzi wa kubakiza Riba ya Benki Kuu kuwa asilimia 6, na bei za bidhaa katika soko la dunia kuwa nafuu.

Amesema Benki Kuu inatarajia kuendelea kuwa na akiba ya kutosha ya fedha za kigeni, na kuongeza fedha za kigeni pale itapohitajika. Akiba iliyopo sasa ni zaidi ya dola za Marekani bilioni 5.5, kiwango ambacho kinatosheleza uagizaji wa bidhaa na huduma kutoka nje kwa zaidi ya miezi 4.7.

"Akiba hiyo inatarajiwa kubaki katika kiwango hicho katika robo ya kwanza ya mwaka 2025 kutokana na juhudi zinazofanywa na Benki kuu katika kuongeza akiba ya fedha za kigeni, ikiwemo kununua dhahabu hapa nchini". Ameeleza Gavana Tutuba.

Sanjari na hayo amesema deni la Taifa liliendelea kuwa himilivu, ambapo kwa mwaka 2023/24 lilikuwa takriban asilimia 41.1 ya Pato la Taifa (GDP) kwa thamani halisi ya sasa (NPV).

Kiwango hiki kilikua chini ya ukomo wa uhimilivu wa nchi na kigezo cha mtangamano wa Jumuiya ya Afrika Mashariki (EAC) cha asilimia 55 na asilimia 50, mtawalia". Amesema

Amesema kwa kuzingatia thamani ya bei za sasa, deni la Taifa lilikuwa asilimia 46.1 ya Pato la Taifa, chini ya kigezo cha mtangamano kwa Jumuiya ya Maendeleo Kusini mwa Afrika (SADC) cha ukomo wa asilimia 60.

Gavana wa Benki Kuu ya Tanzania, Emmanuel Tutuba akiwasilisha mrejesho wa kikao cha Kamati ya Sera ya Fedha (MPC) ya Benki Kuu ya Tanzania kwa Wakuu wa Taasisi za kifedha nchini ambayo ilifanya kikao chake cha kila robo mwaka Januari 7, 2025 na kufanya tathmini ya mwenendo wa hali ya uchumi wa dunia na hapa nchini. Tukio hilo limefanyika leo Januari 8, 2024 katika Ofisi za Benki Kuu ya Tanzania Jijini Dar es Salaam.

Wakuu wa Taasisi za Kifedha nchini wakipata mrejesho wa kikao cha Kamati ya Sera ya Fedha (MPC) ya Benki Kuu ya Tanzania ambayo ilifanya kikao chake cha kila robo mwaka Januari 7, 2025 na kufanya tathmini ya mwenendo wa hali ya uchumi wa dunia na hapa nchini. Tukio hilo limefanyika leo Januari 8, 2024 katika Ofisi za Benki Kuu ya Tanzania Jijini Dar es Salaam.

(PICHA ZOTE NA EMMANUEL MBATILO)

KAMATI YA BUNGE, USTAWI NA MAENDELEO YA JAMII YAWATAKA WATUMIAJI DARAJA LA NYERERE, KIGAMBONI KULIPIA BANDO

*Yasema matumizi ya bando ni nafuu na yanaondoa usumbufu

*Yaipongeza NSSF kwa kuweka mifumo katika Daraja hilo

Na MWANDISHI WETU,

Dar es Salaam. Kamati ya Kudumu ya Bunge ya Ustawi na Maendeleo ya Jamii, imeridhishwa na utaratibu wa manunuzi ya bando la tozo kwa matumizi ya Daraja la Nyerere, Kigamboni ambapo imewataka watumiaji wa daraja hilo kulipia bando kwa sababu ni nafuu, rahisi na linapunguza msongamano na kuongeza mapato.

Akizungumza wakati wa majumuisho ya ziara ya kamati hiyo, Novemba 11 2024, ilipotembelea miradi ya NSSF ukiwemo wa Daraja la Nyerere, Mwenyekiti wa Kamati hiyo, Mhe. Fatma Toufiq, amepongeza kazi kubwa inayofanywa na NSSF katika Daraja hilo hususan ya kuweka matumizi ya bando.

“Tunaendelea kuipongeza Serikali na wenzetu wa NSSF kwa kazi nzuri sana ambayo imefanyika pale Daraja la Nyerere kiukweli kumewekwa mifumo mizuri ambayo licha ya kupunguza changamoto ya foleni lakini pia inapunguza mianya ya upotevu wa mapato,” amesema Mhe. Fatma.

Amesema Kamati pia inamshukuru Rais wa Jamhuri ya Muungano wa Tanzania, Mhe. Dkt. Samia Suluhu Hassan kwa namna anavyoleta maendeleo nchini kwa manufaa ya wananchi na kuwa wanaunga mkono juhudi zote zinazofanywa na Serikali ya awamu ya sita na kuwa wanaamini Mifuko ya Hifadhi ya Jamii ukiwemo wa NSSF utaendelea kuleta tija kwa wanachama kupitia uwekezaji unaofanywa na Mifuko hiyo.

Baadhi ya wajumbe wa kamati hiyo akiwemo Mhe. Katani Katani amepongeza mfumo wa manunuzi ya bando katika Daraja hilo na kuwataka wananchi kujiunga kwani ni mfumo rahisi na rafiki na pia unaondoa foleni.

Naye, Mhe. Mariam Kisangi amesema mradi wa Daraja la Nyerere umechochea maendeleo ya wananchi wa Kigamboni, ambapo amewataka kuendelea kulipia tozo za kupita kwa kutumia bando kwani inapunguza usumbufu.

Kwa upande wake, Mhe. Athumani Maige amewataka wananchi kuendelea kutumia matumizi ya bando wakati wanapopita katika Daraja hilo na pia ameipongeza NSSF kwa usimamizi mzuri wa mradi huo.

Awali, Waziri wa Nchi, Ofisi ya Waziri Mkuu, Kazi, Vijana, Ajira na Wenye Ulemavu, Mhe. Ridhiwani Kikwete, amesisitiza elimu iendelee kutolewa kwa wananchi na watumiaji wa Daraja kutumia malipo ya bando kwani ni rahisi na inapunguza usumbufu.

“Matumizi ya bando ni mazuri na yataongeza mapato, kupunguza kero kwa watumiaji wa Daraja hivyo ni muhimu wananchi kupewa elimu zaidi ili watumie bando kuondoa usumbufu,” amesema.

Mkurugenzi Mkuu wa NSSF, Bw. Masha Mshomba amesema wanaendelea kuwahamasisha watumiaji wa Daraja kulipia bando la siku, wiki au mwezi ili waweze kupita kwa urahisi hasa ukizingatia kuwa matumizi ya bando ni nafuu zaidi.

Bw. Mshomba ameipongeza kamati hiyo na kuahidi kuwa maoni, maelekezo na ushauri uliotolewa na wajumbe wa kamati hiyo wataufanyia kazi kwa ajili ya utekelezaji.

KANISA LA AICT WAUNGA MKONO AGENDA YA NISHATI SAFI YA KUPIKIA

DAR ES SALAAM - AICT

Kanisa la Uaskofu la AICT Pastorate ya Magomeni Dayosisi ya Pwani lililopo Jijini Dar es Salaam limetoa msaada wa Mitungi ya Gesi 20 kwa akina mama wanaoishi maeneo jirani na Kanisa hilo ikiwa sehemu ya shamrashamshara kuelekea Maadhimisho ya Jubilei ya Miaka 50 ya Kanisa hilo.

Msaada huo umetolewa na Askofu Mkuu wa Kanisa la Africa Inland Church Tanzania AICT Musa Massanja Mwangwesela ambaye pia ni Askofu wa Kanisa hilo Dayosisi ya Mwanza ambapo amesema kuwa kutolewa kwa msaada huo ni kuunga mkono jitihada za Mhe. Dkt. Samia Suluhu Hassani Rais wa Jamhuri ya muungano wa Tanzania juu ya utunzaji wa Mazingira kupitia Nishati Safi ya kupikia.

Kwa upande wake Mwenyekiti wa shina Namba 3 Makubusho Suleimani ally Mohamed amelishukuru Kanisa hilo pamoja na Viongozi wa Kanisa hilo kwa wema wao wa kutoa msaada wa Nishati hiyo ya kupikia katika Mtaa wa Uwarani na Maswa.

Nao baadhi ya Wanufaika wa Msaada huo akiwemo Judith Kobelo na Mariamu Gumbo wameshukuru kwa kupewa msaada huku wakisema Nishati hiyo itakavyokwenda kurahisisha upatikanaji wa Nishati hiyo safi ambayo wamekabidhiwa.

Kilele cha maadhimisho ya Jubilei ya Miaka 50 ya Kanisa la Uaskofu la AICT Pastorate ya Magomeni Dayosisi ya Pwani lililopo Jijini Dar es salaam ni Tarehe 27/10/2024, Mgeni rasmi anatarajiwa kuwa Mhe. Dkt. Samia Suluhu Hassani Rais wa Jamhuri ya muungano wa Tanzania